ဒီနားမှာ ဂျာနယ်ဆိုင်လေး ၃ဆိုင်ရှိတယ်။ နေ့စဉ်ထုတ်ဂျာနယ်မျိုးစုံကို ပုံမှန်ရောင်းတယ်။ ဈေးနီး၊ ကားဂိတ်နီး အချက်အချာကျတဲ့ နေရာဆိုတော့ ပုံမှန်ရောင်းနေရတာပါပဲ။
ဒါပေမယ့် ဒီနေ့ကတော့ ထူးတယ်။ ဘာလို့လည်းဆိုတော့ မနေ့ညကပဲ ၂၀၀၈ခုနှစ်အတွက် အကယ်ဒမီ ဆုပေးပွဲကြီး ကျင်းပ ထားတယ်။ ဒါကြောင့် ဒီနေ့ မနက်ထွက်တဲ့ ဂျာနယ်တိုင်းလိုလို မှာ အကယ်ဒမီသတင်းတွေက ဓာတ်ပုံတွေ ဝေေ၀ဆာဆာနဲ့ အချပ်ပိုတွေနဲ့ ပလူပျံထွက် လာတယ်။
စောစောကပြောတဲ့ ဆိုင် ၃ဆိုင်မှလည်း ဒီနေ့မနက်ထွက်တဲ့ ဂျာနယ်အားလုံးကို ကိုယ်စီတင် ထားကြတယ်။
မနက် ၁၁နာရီ ၀န်းကျင်မှာတော့ အသက်အကြီးဆုံးလူ၊ သူရောင်းတဲ့ဆိုင်မှာ အမျိုးသမီး တစ်ယောက်က ဂျာနယ်လာဝယ်တယ်။ အမျိုးသမီးက ဟိုဟိုဒီဒီလှန်လှော ကြည့်ရင်း ..
“ အကယ်ဒမီသတင်းပါတဲ့ ဂျာနယ်ကောင်းကောင်းလေး တစ်စောင်လောက် ။ ဘယ်ဂျာနယ် ကောင်းမလည်း မသိဘူးနော် "
“ အစ်မ ကြိုက်တာဝယ်ပါ။ တစ်စောင်မှ ၅၀၀ကျပ်ပဲ “
“ ဓာတ်ပုံတွေပိုများပြီး ဖတ်လို့ အကောင်းဆုံးရွေးပေးပါလား။ ကျွန်မ နှစ်စောင်ယူမှာ “
“ အဲ.. ဒါဆိုရင်တော့ ဒီဂျာနယ်ကိုယူ။ သူက စာရွက်သားလည်း ပိုကောင်းတယ်။ စာရွက် အရေ အတွက်လည်းပိုများတယ်။ ဓာတ်ပုံတွေကလည်း တခြားဂျာနယ်တွေထက်ကို စုံတယ်။ အင်တာ ဗျုး ထားတာများ ကောင်းမှကောင်းဗျာ။ ခန့်စည်သူ အကြောင်းများ ရေးထား မေးထား လိုက်တာ များ နှိုက်နှိုက်ချွတ်ချွတ်။ အကယ်ဒမီမှန်းထားပြီး မရလိုက်တဲ့ မင်းသမီး မျက်နှာများ သေချာကို အမိရိုက်ထားတာဗျား။ ရောင်းမလောက်လို့ စောင်ရေအပို ကြိုမှာ ထားရတာ။ ဒါပေမယ့် သူက တစ်စောင်ကို ၆၀၀ကျပ်နော် “
အမျိုးသမီးလည်း ဂျာနယ်ရောင်းသူ အပြောကောင်းတာကြောင့် ဂျာနယ်ကို လှန်လှောလို့ တောင် မကြည့် တော့ပါဘူး။ ငွေ ၁၂၀၀ကျပ်ပေးပြီး ဂျာနယ်၂စောင်ဝယ်သွားလေရဲ့။
အမျိုးသမီးလည်း ထွက်သွားရော ညာဘက်ဘေးဆိုင်က ဂျာနယ်ရောင်းသူက..
“ အကိုကြီး.. ခင်ဗျားက တယ်ဟုတ်ပါလား။ ဒီဂျာနယ်က ထွက်သမျှတွေထဲမှာ မစွံဆုံး ဂျာနယ် လေဗျာ။ သတင်းတွေ ဓာတ်ပုံ တွေကလည်း ထူးမခြား နားတွေပါဘဲဗျာ။ ခင်ဗျားတောင် မနက်က ဖတ်ပြီး ငါတော့ အစောင်အရေတွက် ပိုယူမိတာ မှားပြီလို့ ညည်းပြီးတော့။ “
ဘယ်ဘက်ဘေးဆိုင်က ဂျာနယ်ရောင်းသူကလည်း ..
“ အေးလေ.. ပုံမှန်ရောင်းဈေး ၅၀၀ကျပ်ပဲဟာ။ ခင်ဗျားက ၆၀၀ကျပ် တောင်တင်ရောင်း လိုက်သေး “
ဒီတော့… ခုနရောင်းလိုက်သူက..
“ အဲ့ဒါ မင်းတို့မှတ်ထားကွ။ ငါ့လက်ထဲမှာ တခြားဂျာနယ်အစောင်တွေက ၂စောင်လောက်ဘဲ ကျန်တော့ တယ်။ ဒီဂျာနယ်က အခု ဒီအချိန်ရှိတာ တောင် ၁၀စောင်လောက်ကျန်နေသေးတယ်။ ဒီလိုမှ မရောင်းရင် ကုန်မှာ မဟုတ်တော့ဘူး။ လူတွေရဲ့စိတ်က ဒီလိုဘဲ။ အပြောကောင်း ကောင်းလေး နဲ့ပြော၊ ဈေးပိုပေးရတယ်ဆိုရင် ပိုကောင်းတယ် ထင်တတ်တာ သဘာဝဘဲကွ။ အထဲက စာတွေ အရည်အသွေး ကောင်းမကောင်း သူတို့ ဂရုမစိုက် တော့ဘူး။ မယုံရင်ကြည့် သူအိမ်ရောက်ရင် သူဝယ်လာတဲ့ ဂျာနယ်က ပိုစုံတယ်။ ပိုကောင်းတယ်ဆိုပြီး မပြောရင် ငါ့ဇက်လာဖြတ်။ တန်ဘိုး ကြီးကြီး ပေးရရင် ကောင်းတယ်ထင်တတ်တဲ့ လူတွေရဲ့ စိတ်ကို ငါက အသုံးချပြီး ဒီဂျာနယ်ကို ရောင်းထုတ်လိုက်တာကွ။ မယုံရင် မင်းတို့လည်း စမ်းကြည့်။ ဒါပေမယ့် အပြောလေးနဲ့ ရုပ်ခံက တော့ အကယ်ဒမီရှော့ဖြစ်နေရမယ်နော် “
ဒီတော့သူ့ရဲ့ ရောင်းဖော်တွေက သူ့ကို အခုလိုပြောလိုက်တယ်။
“ ဟုတ်တယ်။ ဒီနှစ် အကယ်ဒမီက ခန့်စည်သူ မဟုတ်ဘဲ ခင်ဗျားဘဲ ရရမှာ.. “
လူရဲ့ ပင်ကိုယ်စိတ်ကိုက အကောင်းကြိုက်တတ်ကြတယ်။ ဈေးပိုပေးရရင် ကောင်းတယ် ထင် တတ်တယ်။ အပေါ်ယံ အရှိန်အ၀ါနဲ့ ဟိတ်ဟန်တွေကို ကြည့်ပြီး မှင်မောင်းကောင်း ကောင်းနဲ့ ပြောရင်တော့ ကျသွားပြီသာမှတ်။ ကျီးအာသီးလို ဘ၀တွေမှာ ပျော်မွေ့ နေသူတွေ အတွက် ဒီအဖြစ် အပျက် လေးက သက်သေထူနေတယ်။ သွားရင်းလာရင်း ပို့စ်လေး တစ်ပုဒ်လက် ဆောင် ပေးတဲ့ ဂျာနယ်ရောင်းသူကို ကျွန်မ ကျေးဇူးတင်နေမိတယ်။
ဆန္ဒနဲ့ဘ၀တစ်ထပ်ထဲကျကြပါစေ။
မြသွေးနီ
0 comments:
Post a Comment