ကိုရေအေးတစ်ယောက် စဉ်းစားနေမိတယ်။ လေးလေးနက်နက်ကို စဉ်းစား နေမိတာ။ အမှန်တရား ဆိုတာ နေနဲ့အလား သဏ္ဍာန် တူပါလားလို့။ စဉ်းစား ကြည့်လေ။ နေကို တစ်ချက်လေးမှ မျက် တောင်မခတ်ဘဲ၊ မျက်စိတွေ ကျိန်းစပ်မူးဝေမသွားဘဲ ဘယ်သူက ကြာရှည်ရင်ဆိုင်ကြ ည့် ရဲ ကြ လို့လဲ။ မိုးလင်းက မိုးချုပ် တွေ့မြင်နေရတဲ့ ဆက်ဆံရေးတွေက အမှန်အတိုင်း ရင်ထဲမှာ ရှိတဲ့အတိုင်း ပြောနေကြတဲ့ ဆက်ဆံရေးတွေ မဟုတ်။ ထိခိုက်နာကျင်သွားမှာ စိုးရိမ်စိတ်နဲ့ သက်ညှာချိုသာစွာ ပြောဆို ဆက်ဆံကြတဲ့ ဆက်ဆံ ရေး တွေသာ ဖြစ်နေကြတယ်။အထူးသဖြင့် ကိုရေအေး.. သူက နာမည်နဲ့လိုက်အောင် အေးအေး ဆေး ဆေးနေတတ်သူ။ တဖက် သားအပေါ် အလွန်အားနာ တတ်သူ၊ အလုပ်အကိုင်ကလည်း ကျောင်းဆရာ။ ဒီတော့ သူ့ပတ်ဝန်း ကျင် က လူတွေနဲ့ အလိုက် အထိုက်ပြောပြောနေရတာ ကြာ တော့ သူတော်တော်ကို စိတ်ကုန်နေပြီ။
ဒီနေ့ အိပ်ရာကနိုးတာနဲ့ ကိုရေအေး ဆုံးဖြတ်ချက်ချထားတယ်။ ဘာလို့လည်းဆိုတော့ ဒီနေ့ က သူ့ အသက် ၄၀ပြည့်မွေးနေ့။ ဘာပဲဖြစ်ဖြစ် ဒီနေ့ တစ်ရက်ကတော့ ဒီတစ်နှစ်လုံးရဲ့ ရေလိုက်ငါး လိုက်နေခဲ့ရတာတွေကို အကြွင်းမဲ့အမှန်တရားတွေနဲ့ ခုနှိမ် မယ့်ရက်ဖြစ်ရမယ်။ ဒီအမှန်တရားနဲ့ ပတ်သက်တဲ့ သူ့ရဲ့စမ်းသပ်မှုကို သူ ဘယ်သူ့ကိုမှ မပြောဖူး။ ယုတ်စွအဆုံး သူ့မိန်းမတောင် သူမပြောဘူး။ ဒါက ဒီနေ့တစ်ရက်လေး အတွက် သူနဲ့ သူ့ရဲ့ စေတသိတ် ကြားက သဘော တူညီချက်လေးတစ်ခု။
သူ့မိန်းမက သူ့ကို မနက်စာပြင်ကျွေးချိန်မှာတော့ စိတ်မကောင်းစွာနဲ့ဘဲ သူ့ရဲ့စမ်းသပ်မှုကို မိန်းမဖြစ်သူနဲ့ ဖွင့်ခွင့်ရလိုက်တယ်။ ဇနီးသည်က မနက်စာကိုဆီခြောက်ခြောက်နဲ့လှော်ထားတဲ့ပဲပြုတ်စေ့လေးပါလေယုံ ထမင်းကြော်တစ်ပန်းကန်၊ အပေါစား လက် ဖက်ခြောက် ခတ်ထားတဲ့ လက်ဖက် ရည်ကြမ်းမတ်ခွက်နဲ့အနားပဲ့သစ်သားစားပွဲအိုလေးပေါ်မှာ ထုံးစံအတိုင်းပြင်ပေးလေ တယ်။ သူ့ရဲ့ တို့ကနန်းဆိတ်ကနန်းစားနေတာကို ကြည့်ပြီး မိန်းမဖြစ်သူက ” စားမကောင်း ဖူးလား ကိုရေအေး” လို့ မေးလာတာကို အရင် လို ” ရင်နည်းနည်း ပြည့် နေလို့ပါကွာ ” လို့ ဟန်ဆောင် ပြောမနေတော့ဖူး။
” အေး..မကောင်းဖူး။ နေ့တစ်ဓူဝ ဒီလိုမနက်စာကို စားနေရတာ တော်တော့ကို စိတ်ပျက်မိ တယ်” လို့ပြောချထည့်လိုက်တယ်။ ဇနီးဖြစ်သူမျက်နှာ ကွက်ကနဲပျက်သွားတာတွေ့ပေမယ့် ဒီနေ့ အတွက် ဗွေဆော် ဦး အမှန်တရားကိုပြောခွင့်ရလိုက်လို့ သူ့စိတ်ထဲ ဘ၀င်ကျသွားမိတယ်။
ဒီလိုနဲ့ ကိုရေအေး ဇနီးဖြစ်သူကို လျစ်လျူရှုလို့ ကျောင်းကို ရောက်လာ ခဲ့တယ်။ ဒုတိယအကြိမ် သူ့ရင်ထဲက အမှန်တရားကို စမ်းသပ်ခွင့် ပေးလာခဲ့ သူကတော့ လုပ်ဖော်ကိုင်ဖက်ဆရာတစ်ဦး။ ဆရာများ နားနေခန်းမှာ သူရှိနေတုန်း ” ဆရာကိုရေအေး.. ခင်ဗျားတို့တစ်လမ်းကျော်က ဦးဘဟန်ကြီး မနေ့ညကဆုံးတယ်ကြားတယ်ဗျ။ ငွေကြေးခက်ခဲသူတွေကို သူတတ်နိုင်သ လောက်ပံ့ပိုးကူညီတတ်သူနော်။ စိတ်မကောင်းစရာဗျာ ” လို့ပြောလာ တယ်။ ဒီတော့ ကိုရေအေး လည်း ” ဘယ်ကသာဗျာ.. ဒီလိုလူမျိုးများ မတရားငွေတိုးချေးစားနေတာ။ သနားစရာ တစ်ကွက် မှ မရှိပါဘူး ” လို့ ပိတ် ပြောထဲ့လိုက်တယ်။ ရင်ထဲမှာတော်တော့ကို နေလို့ ထိုင်လို့ကောင်း သွားတယ်။
ကိုရေအေး နောက်ဆုံးအချိန် သမိုင်းဘာသာသင်ကြားနေချိန်မှာ တတိယ အကြိမ်စမ်းသပ်ဖို့ အခွင့်အရေးရခဲ့တယ်။ ကျောင်း စာရေးက ကိုရေအေး အတွက်စာတစ်စောင်လာပေးတယ်။ စာက ကျောင်းအုပ်ဆရာကြီးဆီက။ စာထဲမှာက အိမ်မပြန်ခင်လာတွေ့ပါ လို့ရေးထားတယ်။ ကိုရေအေး ရုတ်တ ရက်ကျောချမ်းသွားမိတယ်။ ပထမပတ် အစမ်းစာမေးပွဲရဲ့ အဖြေလွှာတွေ အခုအချိန်ထိ စစ်ဆေးနေတာမပြီးသေးလို့ ငါ့ကိုတော့ ခေါ်ပြီး မုန့်ဟင်းခါး ကျွေးတော့ မယ်ထင်တယ် လို့တွေး လိုက်မိတယ်။ ဘာလို့လည်း ဆို တော့ ဆရာကြီးက ပြီးခဲ့တဲ့ရက်ကဘဲ သူ့ကိုခေါ်ပြီး အဖြေလွှာ တွေ တစ်ပတ် အတွင်း အပြီးစစ်ဆေးဖို့ ၀မ်နိမ်ပေးထားပြီးသား။ တော်တော်ဆိုးဝါးတဲ့ လက်ရေး တွေနဲ့ရေးထားတဲ့ အဖြေလွှာအုပ် တစ်ရာလောက်ကို နေ့ရွှေ့ည ရွှေ့နဲ့ စစ်နေတာ သီတင်းပတ် အတော်ကြာတဲ့ အထိ မပြီးစီးနိုင်သေး။ တာဝန်နဲ့ ၀တ္တရားက ကိုရေအေးခေါင်းပေါ်မှာ ဓားနဲ့မိုး ပြီးခိုင်းခံထားရသလို ခံစားနေ ရတော့တယ်။
ဒါပေမယ့် ဆရာကြီးရဲ့ ရုံးခန်းကိုရောက်တော့ ကိုရေအေးတစ်ယောက် အထင်နဲ့ အမြင်လွဲ သွားပြီဆိုတာ သိလိုက်ရတယ်။ “ မင်္ဂလာပါ “ လို့ သူနှုတ် ဆက်လိုက်တော့ ဆရာကြီးက ကိုရေအေးကို အလွန်ရင်းနှီးဖော်ရွေတဲ့ ဟန်နဲ့ ..
“ ဒီနေ့ ညနေ ခင်ဗျားအားလား “ လို့ မေးလိုက်တယ်။
ကိုရေအေးက “ ဒီနေ့ ကျွန်တော့ မွေးနေ့ဆိုတော့ ဘုရားသွားမလားလို့ခင်ဗျာ “ လို့ပြော တော့..
“ ဟာ.. ဒါဆို ဘုရားကို နောက်နေ့မှသွားဗျာ။ တိုက်တိုက်ဆိုင်ဆိုင် ဒီနေ့ ခင်ဗျားရဲ့ မွေးနေ့ ဆိုတော့.. ခင်ဗျားရဲ့မွေးနေ့ပွဲကို ကျုပ်အိမ်မှာ အဆိုအတီးနဲ့ သေချာ ကျင်းပပေးမယ်။ ညနေကျောင်းဆင်းရင် ကျုပ်နဲ့ အတူ အိမ်ကိုသာ လိုက်ခဲ့ပေတော့ “
ဒီတော့ ကိုရေအေးလည်း ကြောက်ကြောက်နဲ့ “ ဟုတ်ကဲ့ပါ ဆရာကြီး “ လို့သာ ပြောလိုက် နိုင်တော့တာပေါ့။
ဒီလိုနဲ့ .. ညနေအိမ်အပြန်လမ်းမှာ ဆရာကြီးက…
” ကျုပ်မှာ အကြောင်းထူးရှိတယ်။ ကျုပ်ရဲ့ စန္ဒယားလက်သံကို ခင်ဗျားကို နားထောင်စေချင်လို့ ခုလို ခင်ဗျားကို ခေါ်ရတာဘဲ။ ဒီနေ့တော့ ကျုပ် စန္ဒယားတီးပြီး သီချင်းဆိုပြတာကို ခင်ဗျားက နားထောင်ပြီး ဝေဖန်ပေးစမ်းပါဗျာ။ ခင်ဗျား ဝေဖန်ချက်က ကျုပ် အတွက် အဖိုးတန်လိမ့်မယ်လို့ ယုံကြည်တယ်။ ခင်ဗျားအံ့သြသွားမယ်။ ဘာလို့လည်းဆိုတော့ ဒီလိုကျုပ်ဆိုတတ် တီးတတ်ဖို့ အချိန်တွေ ငွေတွေဖြုန်းပြီး လူမသိသူမသိ ကျိတ် လေ့ကျင့် ခဲ့ရတာဗျ “
ကိုရေအေးက ဂီတပါရမီရှိတယ်။ ကျောင်းကပွဲတွေ ရပ်ကွက်ပွဲတွေမှာ သူ့ပဲအားကိုးနေရတာကို ဆရာကြီးကသိနေတယ်။ ဒါပေမယ့် ကိုရေအေး အတွက်ကတော့ သူဝါသနာပါတဲ့ ဂီတကသူ့ရဲ့ အမှန်တရား အတွက်စမ်းသပ်စရာဖြစ်လာ လိမ့်မယ်လို့ ဘယ်ထင်မိပါ့မလဲ။
” ခင်ဗျား ဖြေလွှာတွေ အမှတ်ဖျက်ရမှာအတွက် ပူမနေနဲ့။ ခင်ဗျားကို နောက်ထပ် အချိန်တစ်ပတ် တိုးပေးမယ်။ ဒါဆို နှစ်ပတ် ခင်ဗျားအချိန်ရသွားပြီ ဆိုတော့ ကောင်းကောင်း လုံလောက်မှာပါ ” လို့ ရယ်ရယ် မောမောနဲ့ ဆရာကြီးကပြောတော့ ကိုရေအေး ရင်ထဲကအလုံးကြီးက ဟင်းကနဲ လျှော ကျသွား ရတယ်။
ဒီလိုနဲ့ ညနေကျောင်းအဆင်းမှာ ဆရာကြီးအိမ်ကို ကိုရေအေး ရောက်သွားတယ်။ အိမ်ရောက် တော့ မီးခပ်မှိန်မှိန်ထွန်းထားတဲ့ အခန်းတစ်ခုဆီကို ခေါ်သွားတယ်။ ဆရာကြီးအိမ်ကို ကိုရေအေး အခုမှ ပထမဆုံးအကြိမ် ရောက်ဖူးတာပါ။ အခန်းထဲမှာ မဲပြောင် လက်နေတဲ့ စန္ဒယားအိုတစ်လုံးကို တွေ့လိုက်ရတယ်။ ဆရာကြီးက ကိုရေအေးအတွက် အိမ်ကလူတွေကို စားစရာသောက်စရာတွေ စီစဉ်စေပြီး သူကိုယ်တိုင်ပြာပြာသလဲ ဧည့်ခံလေ တယ်။
တစ်အောင့်လဲကြာရော ဆရာကြီးက ” ကဲ.. ကျွန်တော်တို့ စလိုက်ကြစို့” လို့ဆိုပြီး စန္ဒယားခုံ မှာ နေရာယူလိုက်တယ်။ ပြီးတော့…
” ခင်ဗျားကို စန္ဒယားလှထွဋ်ရဲ့ တိမ်တမန် ဆိုပြမယ် ။ သေခြာခံစားနားထောင်နော် ”
လက်ပေါက်ကြမ်းတဲ့ စန္ဒယားလက်သံ တဖြောဖြော က ကိုရေအေးနားထဲ မြင်းဒုန်းဆိုင်းသလို ပြေးဝင်သွားတယ်။ အတော တီးလုံး အပြီး သီချင်းသံ စ၀င်ထဲက အံဝင်ခွင်ကျမဖြစ် လွဲချော်နေတဲ့ ကီးတွေ။ ကိုရေအေးတစ်သက် ဒီလောက် ဆိုးဝါးတဲ့ လက်သံနဲ့ ဒီလောက် ဘာကီးမှ မ၀င်တဲ့ အသံမျိုး မကြားဘူးခဲ့။ ခုတော့ ကြောက်ရွံ့စိတ်၊ ရိုသေစိတ်နဲ့သာ သီချင်းကို အောင့်အီးနားထောင် ပေးနေရတာ စိတ်ထဲတော့ တော်တော့ကို မသက်မသာ ဖြစ်နေရပြီ။ ဒါပေမယ့် ဆရာကြီးကတော့ တော်တော့ကို အရှိန်ရနေပြီ။ နဖူးကစီးကျလာတဲ့ ချွေးတွေကို သုတ်ရင်း နောက်တစ်ပုဒ်ကိုတောင် အစပျိုးနေပြီ။ ဆရာ ကြီးဒုတိယ တစ်ပုဒ်အဖြစ်ရွေးချယ် ပြီး ဆိုနေတဲ့ ကိုတင်လှိုင်ရဲ့ ” အမုန်းခွန်အား ပေးသနားပါ ” က ကိုရေအေး အနှစ်ခြိုက်ဆုံး သီချင်း။ သွားပါပြီ။ သီချင်းတော့ ပျက်ဆီး ခြင်း ငါးပါးနဲ့ ပျက်စီးပါပြီ။ ဆရာကြီးရဲ့ ပြာအက်အက် အသံနဲ့ အတူ တလွဲ လက်သံတွေက သွပ်ပြားပေါ် ကြောင် လျှောက်နေ သလိုမျိုး။ ကိုရေအေးလည်း ဘာမှပြောလို့ မရတော့မယ့်အတူတူ စိတ်ပျက်လက်ပျက်နဲ့ အနားက ရေပုလင်းထဲက ရေကိုသာ ဂွပ်ကနဲ ဂွပ်ကနဲနဲ့ တစ်ခွက်ပြီး တစ်ခွက် ဆင့်သောက်နေ မိတော့တယ်။ ဆရာကြီးကတော့ သူ့ရဲလက်သံ ထဲမှာ သူ့ဟာသူ ဈာန်ဝင် စီးမြော လို့။ သည်းညည်း ခံပြီးနား ထောင်နေလျှက်က သီချင်းတစ်ပုဒ်က ဘာလို့ဒီလောက်တောင်ကြာရတာလည်းလို့ စိတ်အချဉ်ပေါက် ပေါက်နဲ့ ကိုရေအေးတွေး နေ မိတယ်။ ကိုရေအေး ခေါင်းတွေ တဆစ်ဆစ် ထိုးကိုက်လာတယ်။ ချွေးသီးချွေး ပေါက်တွေ စိမ့်ထွက် လာတယ်။
ဒီလိုနဲ့ ဆရာကြီးက တတိယ အပုဒ်ကူးမယ်အလုပ် ကိုရေအေးကိုလှမ်းမေးလိုက်တယ်။
” ဘယ်နှယ့်လည်း.. အဆင်ပြေရဲ့လား.. ကောင်းရဲ့လား ကျုပ်ရဲ့ အဆိုအတီး။ ခင်ဗျားအမြင်ကို ပြောပါဦီး ကိုရေအေးရဲ့ ”
ကိုရေအေးအခက်တွေ့သွားတယ်။ ဒီနေ့မှ..။ အမှန်တရားဘဲ ပြောပါ့မယ်လို့ သူ့ရဲ့ သံမဏိ အဓိ ဌာန် ချမှတ်ထားတဲ့နေ့မှ။
” နက်ဖြန်မှ ပြောလို့မရဘူးလား ဆရာကြီး ” လို့ ကိုရေအေးက ခပ်ဆိုင်းဆိုင်း နဲ့ဈေးစစ် လိုက်မိတယ်။
အဲ့ဒီလို ပြောလိုက်ကာမှ ဆရာကြီးက နဖူးကြောရှုံ့သွားပြီး..
” မရဘူး.. ခုချက်ခြင်းသိချင်တယ်။ ပွင့်ပွင့်လင်းလင်းသာ ပြောစမ်းပါ ” လို့ ဖိအားပေးတယ်။
ကြောက်ရွံ့စိတ်ကြောင့် ကိုရေအေးတုန်ရီလာပြီး ခန္ဓာကိုယ်တစ်ခုလုံးချွေးစေးတွေနဲ့စိမ့်လာပေမယ့် အမှန်အတိုင်း ပြောလိုက်ဖို့ စိတ်ပိုင်းဖြတ် လိုက် မ်ိတယ်။
” ဟင့်အင်း.. မကောင်းဘူး.. လုံးဝကိုမကောင်းတာပါ ဆရာကြီး”
” ဒါဆို ကျုပ်ဆက်ဆိုနေလည်း အပိုပဲပေါ့ ”
” ဟုတ်ပါတယ်.. လုံးဝကို ဆက်မဆိုသင့်တော့ပါဘူး”
ကိုရေအေး အဖို့ မထူးတော့။ ဒီထက်ပို ဆိုးဝါးတဲ့ အခြေအနေလည်း မရှိနိုင်တော့လို့ တစ်ခါထဲ အပြတ်ကို ပြောချလိုက်တော့တယ်။
ဆရာကြီးက မမျှော်လင့်ထားလို့ထားမသိ။ နဖူးကြောတွေ ခုံးထလာတယ်။ ကိုရေအေး ဆရာကြီး ကို တော်တော် အားနာ သွားမိ တယ်။ ဒါပေမယ့် မတတ်နိုင်ဘူး။ ပြစ်ဒဏ်ကို စီရင်ချက်ချမှတ်ရတဲ့ တရားသူကြီးတွေဟာ စိတ်ထိခိုက်နေလို့မရဘူး။ တစ်ချိန်ထဲ မှာပဲ ငါဘာလို့များ လျှော့လျှော့ ပေါ့ပေါ့ မပြောမိပါလိမ့်လို့ တွေးနေမိပြန်ရော။ ဆရာကြီးကို အားနားလျှက်ကပဲ နှုတ်ဆက်ပြီး အိမ်ကို ပြန်လာခဲ့တယ်။ ဘာပဲဖြစ်ဖြစ် ဒီနေ့အတွက် သူ့ရဲ့ သံမဏိ အဓိဌာန်ကို မချိုးဖောက်မိလိုက်တဲ့ အတွက် ကိုရေအေးတစ် ယောက် ကိုယ့်ကိုယ်တော့ ကျေနပ်သွားမိတယ်။
အဲ့ဒီည အိမ်အပြန်လမ်း တလျှောက်လုံး ကိုရေအေးစိတ်ဆင်းရဲလာတယ်။ အိမ်ရောက်တော့ ကိုရေအေးမိန်းမကလည်း မနက်က ကိစ္စအဆာ မကျေ သေးပုံနဲ့ မျက်နှာ ပုတ်သိုးပြီး ဆန္ဒပြတယ်။
နောက်တစ်နေ့ ကျောင်းရောက်တော့ ဆရာကြီးက ကိုရေအေးကို ဆင့်ခေါ်ပြန်တယ်။ ရုံးခန်းဘက် ကို ဦးတည်နေတဲ့ သူ့ခြေလှမ်းတွေက ခဲဆွဲထား သလို လေးလံနေလျှက်ကပဲ ဆရာကြီး ရှေ့ကို သူရောက်သွားခဲ့တယ်။ ဆရာကြီးက..
” အေးဗျာ.. မနေ့ညက ကျုပ်အပေါ် အမှန်အတိုင်း ထောက်ပြပေးတာ သိပ်ကောင်းတယ်။ ဒီလို ဆိုတီးနိုင်ဖို့ ကျုပ်အချိန်တွေ ငွေတွေ အတော်ရင်း ခဲ့ရတာ။ ခင်ဗျား မတိုင်ခင် ခေါ်လာတဲ့သူ မှန်သမျှက ခင်ဗျားလို မဟုတ်ဖူး။ ကျုပ်ဘာဆိုဆို ဘာတီးတီး ကောင်းတယ်ချည်းပဲ ပြောခဲ့ကြ တယ်။ ဒါပေမယ် သူတို့စိတ်ထဲ ကျုပ်ကို ဒီအသက်အရွယ်ကြီးကြမှ ထ.. ကြောင်နေတယ်လို့ ကွယ်ရာမှာ အတင်းစကားဆိုမှာ သေခြာတယ်။ ဒါကြောင့် ခင်ဗျားကို ကျေးဇူးတင်တယ် “
ဆရာကြီးရဲ့ စကားကြောင့် ကိုရေအေး သက်ပြင်းလေး ကျိတ်ချယုံရှိသေး..
” ဒါနဲ့ စကားမစပ် ခင်ဗျား စာမေးပွဲ အဖြေလွှာတွေရော စစ်ပြီးပြီလား ”
” ဗျာ.. မနေ့ညကဘဲ ဆရာကြီး ကျွန်တော့ကို အချိန်နှစ်ပတ်ပေးထားတယ်လေ”
” ဟုတ်တော့ဟုတ်တယ်။ ဒါပေမယ့် ကျုပ် ပြန်စဉ်းစားကြည့်လိုက်တော့ ဒီအဖြေလွှာတွေကို နက်ဖြန်အပြီး ခင်ဗျား စစ်ပေးမှ ဖြစ် တော့မယ် “
” ဗျာ.. နှစ်ရက်လောက် အချိန် ထပ်ပေးပါ ဆရာကြီးရယ်”
” မရဘူး.. နက်ဖြန် အဖြေလွှာ အားလုံး စစ်ပြီးတာ ကျုပ်လိုချင်တယ်။ သြော်.. ဒါနဲ့ ခင်ဗျားလစာ နှစ်တိုးကိစ္စ ကျုပ် အကန့်အသတ် မရှိ ဆိုင်းငံ့ထား လိုက်တယ်.. ကဲ ..ခင်ဗျား သွားလို့ရပြီ”
” ဗျာ ”
တဗျာဗျာနဲ့ ဗျာအပြီးမှာတော့ ကိုရေအေး သက်ပြင်းကို ဟူးကနဲ အလုံးလိုက်ကြီးကို ချလိုက်မိတယ်။ ကိုရေအေး သေချာ သိလိုက် ရပြီ်။ တစ်ရက်စာ အမှန်တရားကြောင့် သူရင်းလိုက်ရတဲ့ အမှားတစ်ရံ အကြောင်းကိုပေါ့။
ဆန္ဒနဲ့ဘ၀တစ်ထပ်ထဲကျကြပါစေ။
မြသွေးနီ
0 comments:
Post a Comment