မတူညီသောတူညီခြင်း

ချစ်ခင်ရပါတဲ့ မချစ်ကြည်အေး က " အသွင်တူ၏ မတူ၏  " ဆိုတဲ့ ခေါင်းစဉ်လေးနဲ့ Tag လာလေတော့ မြသွေးနီလည်း စိတ်ကူးထဲ ရေးလုလတံ့၊ ရေးလုဆဲ၊ ရေးလုခင် ဖယိုဖရဲ အတွေးလေးများအား ခဏခေါက်သိမ်းလို့ အကြွေးရှိရင် မနေတတ်သူပီပီဘယ်လိုများပြန်ရေးရင် ကောင်း မလဲလို့ အတွေးတွေ တစ်ပြုံ တစ်မကြီး နယ်ချဲ့နေမိပါတယ်။

အသွင်တူ၏ မတူ၏...တဲ့။  ရှေးရှေးခေတ် စကားပုံကတော့ " အသွင်တူမှ အိမ်သူဖြစ်တယ်" တဲ့။ အသွင်မတူရင် ဘ၀ခရီးလျှောက်ရာမှာ အဆင်မပြေ တတ်ဘူးတဲ့။ ဒါတွေကို ကျွန်မကတော့ ရာနှုန်းပြည့် မမှန်နိုင်ဘူးလို့ ထင်မိတာပါ ဘဲ။ ဒီနေရာမှာ အသွင်ဆိုတာ ရုပ်အသွင်အပြင်ထက် စိတ်အသွင် သဏ္ဍန်ကို ရည်ညွှန်းတာ။ စိတ်အသွင်သဏ္ဍန်မှာမှ နားလည်မှု၊ စာနာစိတ်လေး ပြွန်းထားတဲ့ စိတ်လေးနဲ့ အခြေခံတည်ဆောင်ထားရင် မျှခြေညှိစရာ ကို မလိုတော့ပဲနဲ့ အော်တိုမက်တစ်ကို ဘ၀နှစ်ခုက အနီးစပ်ဆုံး ညီမျှခြင်းထပ်တူကျလာမယ်လို့ ကျွန်မထင်တယ်။ ရုပ်ဆိုတာမျိုး ကတော့ အမြင်အာရုံနဲ့ တွေ့တွေ့ချင်းက အပြန်အလှန် ဖမ်းစားထားပြီးသား။ မိသားတစ်စုထဲ၊ မိခင်တစ်ဦးထဲက မွေးဖွားလာသူချင်း အတူတူတောင် ကွဲပြားတဲ့စိတ်၊ အသွင်သဏ္ဍန်ရှိနေသေးတာ။ တစ်မိစီကနေ ပေါက်ဖွားလာသူ နှစ်ဦးထပ်တူ ထပ်မျှကျဖို့ရာ ဘယ်လိုမှ မဖြစ်နိုင်ပါဘူး။ ချစ်သူဘ၀မှာ အချစ်စိတ်တွေ မိုးမွှန်လို့ ညှိနှိုင်းမရတာ တွေကို တော်ယုံ တန်ယုံ လျစ်လျူရှုနိုင်ခဲ့ပေမယ့် အိမ်ထောင်သည်ဘ၀မှာတော့ တစ်ဦးစီရဲ့ ကောင်းမှု၊ မကောင်းမှု စရိုက်တွေက မှောက်ထားတဲ့ ခွက်ကိုလှန်လိုက်ဘိသကဲ့သို့ ဘွားဘွားကြီးကို ပေါ်လာတော့တာနော်။ ဒါကြောင့် အဆင်မပြေတာတွေကို အပြန်အလှန် နားလည်မှု၊ စာနာစိတ်လေးတွေနဲ့ တစ်ဖြေးဖြေး ပွတ်ဖျက်ရင်း၊ သူတင်းရင် ကိုယ်လျှော့၊  ကိုယ်တင်းရင် သူကအလိုက်တသိရှိရင်းနဲ့ ဘာသာမသိလိုက်ခင်မှာပဲ နှစ်ဦးသား မျှခြေတစ်ခုမှာ အတူတကွ ယှဉ်တွဲ ရပ်နေမိလျှက်သားရှိလာကြတာ။ ကျွန်မကြတော့ရော....။ မြသွေးနီ ကြတော့ရော...။ အဲ.. ကျွန်မတို့နှစ်ယောက်ကတော့ " မတူညီသော တူညီခြင်း" လို့ ခပ်ရွတ်ရွတ် အမည်တပ်ရင်ကောင်းမလားမသိ။ လူကြီးက .. သူက...တစ်မျိုး...။ ကျွန်မကရော... ။ အင်း ကျွန်မက လည်း ...။

......................................................................................................

>>>>သူနဲ့ ကျွန်မအကြား. - မတူတာ နဲ့ တူတာများ <<<<

အသက် - ကျွန်မက သူ့ထက် ၆နှစ်တိတိငယ်တယ်။ ကျွန်မကလည်း သူ့ကို ကျွန်မနဲ့ အသက်နည်းနည်းသာ ကွာတယ်လို့ ဟိုး...အစက ထင်ခဲ့မိ တာ။ နင်လား ငါလားကြတော့ ၆နှစ်ကြီးများတောင်ကွာတာ။ ကျွန်မက လူကောင်ကြီးတော့ မသိသူတွေက ကျွန်မတို့ နှစ်ယောက်ကို ရွယ်တူထင် နေကြတယ်။ သူ့ကိုနုတယ်တဲ့။ ဒါကိုပဲသူက ကြံဖန်ဂုဏ်ယူနေရှာတာ။ ကျွန်မကလည်း နဂိုရှိရင်းစွဲထက် အသက်ကြီးချင်နေတတ်သူဆိုတော့ အဟုတ်ကို အံဝင်ခွင်ကျဖြစ်လို့။ ဒီတော့ အသက်ကမတူ.. အရွယ်တူလို့ပြောရမလားဘဲ။

မိသားစု - သူက မိသားစုများသူ။ ကျွန်မကတော့ မောင်လေးနဲ့မှ ၂ယောက်ထဲ။ အဲ့လိုမတူညီ ပေမယ့် သူက သူ့မိသားစုမှာ ယောကျာ်းလေး အကြီးဆုံးဆိုတော့ မိသားစုမှာအကြီးဆုံးဆိုတာခြင်း တူနေပြန်ရော။ မိဘ အစုံအလင်ရှိနေတဲ့ သူက အမေမရှိရှာတော့တဲ့ ကျွန်မကို သနားမိကြောင်း မကြာခဏဆိုသလို ပြောတတ်တယ်။ ဒါကြောင့်လည်း အမြဲဂရုစိုက်တယ်။

ပညာရေး - သူနဲ့ ကျွန်မက မေဂျာတူ။ ကျွန်မက 1st year သူကဖိုင်နယ်တွေ့ကြတာ။ သူကျောင်းပြီးသွားပေမယ့် ကျွန်မနဲ့ တပူးတွဲတွဲရှိခဲ့လို့ ဆရာမ တွေက နှစ်ကြော့ပြန်ဘွဲ့ရသင့်သူလို့ ကင်ပွန်းတပ်ခံရသူ။ အံ့သြစရာတစ်ခုက ကျွန်မတို့နှစ်ယောက် မပေါင်းစည်းခင် ၁၁နှစ်လုံးလုံး မပျင်းမရိ အတူတူရှိနေခဲ့ကြတာ။ တစ်ယောက်အကြောင်း တစ်ယောက် စောဖေက နောကြေနေကြပြီ။

ရုပ်ရည်သွင်ပြင် - ကျွန်မကတော့ သူ့ကို ဘဲရုပ်ဆိုးလို့ နာမည်ပြောင် ခေါ်ခဲ့တာ။ သူနဲ့ကျွန်မကို  ရုပ်ချင်းဆင်တယ်လို့  ပြောကြတယ်။ ကျောင်းတုန်း က မောင်နှမထင်လို့ သူ့ကို ယောက်ဖခေါ်ခံရလို့မအီမလည်ဖြစ်ခဲ့ရတာ မှတ်မိသေး။ ကျွန်မရုပ်ကတော့ သိကြတော်မူတဲ့အတိုင်း။ :) ဘာပဲဖြစ်ဖြစ် ကျွန်မတို့၂ယောက်ကို တွေ့သူတိုင်းက ချစ်ခြင်းမေတ္တာတရားတွေ သူတို့ဆီကို ကူးစက်ခြင်းခံရတယ်လို့ ပြောကြတယ်။ အဲ.. သူနဲ့ကျွန်မက ရုပ်တင်မကဘူး လက်ရေးကလည်းတော်တော်လေး ဆင်နေပြန်တယ်။

တာဝန်နဲ့ဝထ္ထရား - သူကအိမ်နဲ့ ၁၅မိနစ်လမ်းလျှောက်တောင်ရောက်တဲ့ သူဝါသနာပါတဲ့ စာအုပ်စာပေလုပ်ငန်းတွေနဲ့ သူ့ရဲ့ရုံးမှာ မနာလိုစရာ ကောင်းအောင် ပျော်မွေ့လို့။ ဆန္ဒနဲ့ဘ၀တစ်ထပ်တည်းကိုကျကြလို့။ ကျွန်မမှာသာ ကုမ္ပဏီတစ်ခုမှာ အမြစ်တွယ်နေတဲ့ ၀န်ထမ်းဆွေးတစ်ဦး။ အိမ်မှာ လူခွဲမရှိလေတော့ သူက ဈေးဝယ်၊ အ၀တ်လျှော်တာဝန်ယူ။ ကျွန်မက မီးပူတိုက်၊ ဟင်းချက်ပေါ့။ သူကတော့ သူ့တာဝန်သူ အမြဲကျေပြွန်သူ။ ကျွန်မသာ သူခလုပ်နှိပ် ဒိုင်ခံလျှော်ပြီးသမျှ ပြည့်မောက်လျှံနေတဲ့ မီးပူတိုက်ရမယ့် အ၀တ်ခြင်းကြီးကိုကြည့်လို့ သက်ပြင်းမောတွေ အကြိမ်ကြိမ် ချလို့ပေါ့။ တစ်ခါတစ်ခါ ကျွန်မက အပျင်းကြီးလို့ သူ့လက်ရာလေးစားချင်လိုက်တာ.. လို့  ညာတာပါတေးနဲ့ ပြောရင် .. ရူးချင်ယောင်ဆောင် မနေနဲ့... ဆိုပြီး ရှုတေတေနဲ့ ၀င်ချက်ပေးတတ်ပါသေးတယ်။  တစ်ပတ်တစ်ခါ အိမ်ကိုတော့ အတူတူရှင်းကြတာပေါ့။ နှစ်ဖက်မိဘတွေကို လစဉ်မှန်မှန် ပံ့ပိုးကန်တော့ကြတာလည်း မပျက်ကွက်ခဲ့ကြပါဘူး။

စိတ်နေသဘောထား - သူက အားနာတတ်သူ၊ သနားတတ်သူ၊ စိတ်ကလည်း အလွန်ရှည်တတ်သူ။ အားနာတတ်ပုံများ ကျောင်းတုန်းကသူ့အင်္ကျီ လေးကြိုက်တယ်ဆိ်ုလို့ ချက်ခြင်းချွတ်ပေးခဲ့တာ။ သူကို ခါးပိုက်နှိုက်ခံနေရတာသိတာတောင် အားနာလို့ မသိချင်ယောင်ဆောင်ပေးခဲ့တာ။ ကျွန်မ ကတော့ စိတ်မြန်လက်မြန်၊ သနားတတ်တယ်၊ အတိုင်းအတာတစ်ခု အထိတော့ အားနာတတ်တယ် ။ ကျွန်မကတော့ ကိုယ်မှန်ရင်ဘယ်သူမှ မကြောက်၊ အားမနာတတ်သူမျိုး။  နောက်.. သူက တနင်္ဂနွေသားပီပီ စိတ်ကောက်တတ်တယ်။ သူစိတ်ကောက်ရင် ဘာမှမေးမရတော့ဘူး။ နောက်နေ့ကြရင်တော့ အလိုလိုစိတ်ပြေပြီး ကျွန်မအတွက် surprise ဖြစ်နိုင်မှာလေးတွေ လုပ်ထားပြီး  စိတ်ကောက်တဲ့ သူကပဲ  တစ်ဖန်ပြန်ချော့လေတယ်။ အစက အထာမသိလေတော့ သူစိတ်ကောက်ရင် ဘာဖြစ်တာလဲ.. ပြောလေ..ဆို မရမကမေးပေါ့။ အခုတော့ ..ရိုး..ဟိုး...သွားပြီ။ မပြောရင်နေ.. လုံးဝမှ မမေးတော့။ ကိုယ်စာဖတ်ချိန်.. စာရေးချိန်ပိုတောင်ရသေး။ နောက်တစ်နေ့ သူ့ရဲ့ surprise ချော့နည်းလေးက ဘာများဖြစ်မလဲ ကြိုတင်ရင်ခုန်နေရတာကိုက  စိတ်လှုပ်ရှားစရာ..။  နောက်.. သူကရှက်တတ်သူ။ အင်္ကျီအသစ် ချက်ခြင်းဝတ်ရမှာရှက်သူ။ အသုံးအဆောင်အသစ် အိမ်မှာ ၀ယ်ထားလို့ အဲ့ဒီနေ့များ အိမ်ကိုဧည့်သည်လာရင်ရှက်လို့ နေစရာကိုမရှိတော့ ။ ဘယ်လိုလူကြီးမှန်းမသိ။ ကျွန်မများဝယ်လာတဲ့ အသစ်ချက်ခြင်းဝတ်ရင် တစ်ပတ်လောက်ထားလိုက်ပါဦးကွာ..တဲ့။ နောက်သူက ပေါင်းသင်း ဆက်ဆံရေး အလွန်ကောင်းသူ။ အပေါင်းအသင်းများသူ။   ကျွန်မတို့ ရပ်ကွက်မှာ ကျွန်မထက်သူ့ကို လူပိုသိကြတယ်။ လမ်းသွားလို့ မတိုးဘူးဆို အနည်းဆုံး တစ်ယောက်တော့ သူ့အသိနဲ့တိုးရစေမယ်။ ဗုဒ္ဓုဟူး နဲ့ တနင်္ဂနွေ အုံးမနွေးဆိုပဲ။ ဒါဆို   သူနဲ့ကျွန်မကရော.........။  ကျွန်မတို့ ၂ယောက်လုံး ရှေ့ဖြစ်တို့.. ဗေဒင်တို့ မယုံတတ်ဘူးရှင့်။

အစားအသောက် - သူက ဘုရားစူး ကုလားစာကြိုက်သူ၊ ညအချိန်မတော်ကြီးတောင် လမ်းထိပ်က ကုလားမကြီး ဘရာကြော်လေးစားချင်လိုက်တာ တ..နေသူမျိုး။ ကျွန်မက တရုပ်စာ ကြိုက်သူ..။ သူက ငါးဆိုအသေကြိုက် ၊ ကျွန်မက လာခဲ့အသီးအရွက်.. ဘာအသီးအရွက်လာလာ နွားဝင်စားလို စားတာ။ ဒီတော့ တစ်ခါတစ်ခါ အပြင် ထွက်စားမယ်ဆို သူနဲ့ကျွန်မ ကလေးများလို စုန်.. ဆန်...ဆီ ..လုပ်ရပြီ။ ကျားဗိုလ်ဆွဲရပြီ။ သူပဲနိုင်နိုင် ..ကျွန်မပဲ နိုင်နိုင် နိုင်တဲ့သူ အကြိုက်လိုက်စားကြတာပဲ။ အခုတော့ ကျွန်မလဲ ချာပါတီ၊ ပူရီ ၊ ဒန်ပေါက်ကြိုက်တတ်လာပြီ ။ သူကလည်း ကြေးအိုး တစ်ပွဲဆိုကုန်အောင် သောက်မယ့်စိတ်မျိုး မွေးတတ်လာပြီ။ အဲ့ဒီလို သူ့အကြိုက် ကိုယ့်အကြိုက်လိုက်စားလိုက်ရ လို့လဲ ကိုယ်စီ စိတ်ကသိကအောင့် မဖြစ်ကြပါဘူး။

ဝါသနာ - ၀ါသနာကြတော့ ၂ယောက်လုံးထူးခြားစွာ တူနေကြတယ်။ ၂ယောက်လုံးစာဖတ်ဝါသနာပါတယ်။ စာအုပ်ဝယ်ဖို့ ဘယ်တော့မှ ညှိနှိုင်း စရာမလိုခဲ့ဘူး။ မနက်မိုးလင်းရင် အိပ်ရာထဲက စာအုပ်ပုံတွေထဲက ၂ယောက်သား တိုးဝှေ့ထရတယ်။ သူကလည်း ကဗျာသမား၊စာသမား။ ကျွန်မ အသက် ၁၈နှစ်..၁၉နှစ်တုန်းကရေးခဲ့သမျှစာတွေ သူပဲ မဂ္ဂဇင်းတိုက်တွေ ခြေတိုအောင်ပို့ပေးခဲ့တာ။ သူကအခုဆို ကျွန်မကို အွန်လိုင်းမှာ စာရေး တာထက် အပြင်မှာ စာရေးစေချင်သူ။ ကျွန်မကလဲ အားအားရှိ ဘလော့ဂ်ပဲ ဂင်ချင်နေသူ။ ဒါပေမယ့် ကျွန်မဘလော့ဂ်လေးအတွက် ကျွန်မရဲ့ပို့စ်တွေ အတွက် အကြံအမြဲပေးတတ်သူ။ ယုံမလားမသိ.. ကျွန်မရဲ့ ၀က်ဘ်ဆိုက်ကို သူတစ်ခါမှမရောက်ဘူးသေးဘူးရှင့်။ ကျွန်မအပြောနဲ့ပဲ သူကပုံဖော် နေတာတဲ့။ တကယ် ဟုတ်မဟုတ်တော့မသိ။  နှစ်ယောက်သား သီချင်းဆိုရတာလဲ ၀ါသနာပါတယ်။ ကာရာအိုကေဆိုလို့ကတော့ မိုက်ခ်ကို အပြန်အလှန် လုယူရတဲ့အထိပဲ။ သူက မြန်မာသီချင်းတွေ ပိုင်ပိုင်နိုင်နိုင်ဆိုရင် ကျွန်မမှာ အသက်ရှူတွေမှားလို့။ အချက်အပြုတ်ကလည်း ၂ယောက်လုံး ၀ါသနာပါသေးတယ်။ ဒါပေမယ့် နှစ်ယောက်သား ဟင်းအတူတူချက်လို့တော့မရဘူး။ အတူတူချက်လို့ကတော့ ဟင်းတောင် ဆီမသတ်ရသေးဘူး  ပွဲပျက်ပြီသာမှတ်။ သူက စိတ်ရှည်လက်ရှည် နဲ့ စိမ်ပြေနပြေချက်သူ။ ကျွန်မက ဒိုးဒိုးဒေါက်ဒေါက် ချက်ပြုတ်တတ်သူ။ ဒီတော့ သူစီစဉ်ထားတာတွေ ကျွန်မက မှားသွန်မိ၊ မှားထည့်မိ၊ အဲ့ဒီတော့ ပဋိပက္ခတွေကြားမှာ ဟင်းအိုးက အချောင်တရားခံဖြစ်ရရော။ အဲ့ဒီကထဲက ၂ယောက်ပူးတွဲပြီး ဘယ်တော့မှ မချက်ပြုတ်ကြေးဆို ရန်နပိုစာချုပ်ချုပ်ထားတယ်။ ညဖက် လူခြေတိတ်ချိန်တွေမှာ ဂီတာအိုလေး ရံဖန်ရံခါတီးဖြစ်ပါတယ်။ သူဂီတာတီးရင် ကျွန်မကဆိုတာများပြီး ကျွန်မဂစ်တာတီးပြီး သီချင်းဆိုရင်တော့ သူက ငြိမ်သက်စွာ နားထောင်ရင်း အဓိပ္ပါယ်ဖော်နေတတ်သူပါ။

ကြိုက်တာနဲ့ မကြိုက်တာ - နှစ်ယောက်လုံး စိန်ရွှေကျောက်မျက်တွေ မမက်မောဘူး။ ၀တ်ရမှာရှက်တယ်။ စာအုပ်တွေ မက်မက်စက်စက် မက်မော တယ်။ သီချင်းတွေ နားထောင်ကြတယ်။ ပရဟိတအလုပ်တွေ လုပ်ဖို့ ၀ါသနာပါတယ်။ တန်ဘိုးရှိပြီး သေးကွေးတဲ့ ပစ္စည်းလေးတွေ ကြိုက်နှစ်သက်တယ်။ သူက ကြွက်ဆို လွန်လွန်ကျူးကျူးကြောက်သူ။ ကျွန်မ ကတော့ တွန့်လိမ်တွန့်လိမ်နဲ့သွားတတ်တဲ့ တီကောင်၊ ကင်းခြေများ၊.. အမယ်လေး ပြောရင်း ကြက်သီး ထနေပြီ.. အသေကြောက်ပေါ့။  သူရော ကျွန်မရော အိမ်မှာနေရတာကို ခုံမင်တာတူတယ်။ ပင်လယ်ကမ်းခြေတွေကို ချစ်မက်တာတူတယ်။ ကျွန်မက လှလှပပနေရတာကြိုက်ပေမယ့် ရေချိုးအလှပြင် ၁၀မိနစ်ဆို ကျွန်မအတွက် လုံလောက်နေပြီ။ သူကတော့ ရေတစ်ခါချိုး ပဲကြီး အရေခွံတက်အောင် တစ်မေ့တစ်မော။ ကျွန်မက စိတ်မြန်လက်မြန်၊ သူက အရာရာမှာ စိတ်အေးလက်အေး။ သူက စီမံကိန်းရေးဆွဲသူဆို ကျွန်မက အကောင်အထည်ဖော်သူပေါ့။ ကျွန်မတို့၂ယောက်မှာ တူတာနောက်တစ်ခုက ကိုယ်တွေအချင်းချင်းသာ နားလည်တဲ့ ဟာသလေးတွေ ပြောတတ်ကြတာပါဘဲ၊ ဒီလို ရယ်စရာလေးတွေ ပြောရတာကို သူရောကျွန်မရော သဘောကျပေမဲ့ ကျွန်မကရယ်ရင် အူလှိုက်သည်းလှိုက် အားပါးတရ အသံထွက်ပြီး အော်ကြီးဟစ်ကျယ် ရယ်မောတတ်သူ.. သူက ဒီလိုရယ်တာကို မကြိုက်ဘဲ ကြိတ်ပြုံးကလေးသာ ပြုံးတတ်ပြီး သူသိပ်သဘောကျတာမျိုး ရှိရင်တော့ လူတစ်ကိုယ်လုံး တစ်သိမ့်သိမ့်တုန်အောင် အသံမထွက်ဘဲ ရယ်မောတတ်သူပါ။

မတူညီသော တူညီခြင်း - တူညီခြင်း၊ မတူညီခြင်းတွေနဲ့ရောယှက်နေတဲ့ သူနဲ့ကျွန်မကို မျှခြေညှိပေးလိုက်တဲ့၊ ကျွန်မတို့၂ဦးလုံးရဲ့ နှလုံးသည်း ပွတ်ကို ချည်နှောင်မယ့် နှောင်ကြိုးလေးတစ်ပင်က တစ်နေ့မှာ ခိုင်မြဲစွာနဲ့ ရစ်ပတ်လာခဲ့တယ်။ သားသားကို မွေးတဲ့နေ့မှာတော့  သူက ကျွန်မလက်ကို သူ့လက်အစုံနဲ့အုပ်မိုးဆုတ်ကိုင်လို့ ကျေးဇူးတင်ကြောင်း အခါခါပြောပြီး ကျွန်မဘယ်တော့မှ မမေ့နိုင်မယ့် ကဗျာတိုလေးတစ်ပုဒ်ကို  ရွတ်ဆိုကာ လက်ဆောင်ပေးခဲ့လေတယ်။

ကဲ... ကျွန်မ စိတ်တွေအရည်မပျော်ဆင်းပဲ ခံနိုင်ပါတော့မလားရှင်..။ သူပြောခဲ့ဖူးတဲ့ စကားတစ်ခွန်းရှိတယ်။ လူတွေဟာ သူတို့ရဲ့ အသက်ရှင် နေထိုင်နေသမျှ ကာလပါတ်လုံးမှာ သူတို့ရဲ့ ကိုယ်ပွားကို အမြဲလိုက်လံရှာဖွေနေတတ်ကြတယ်တဲ့။ တချို့က စစ်မှန်တဲ့ကိုယ်ပွားရလို့ ဘ၀တစ်လျှောက်လုံး အေးချမ်းပျော်ရွှင်ရတယ်တဲ့။ တချို့ကတော့ စစ်မှန်တဲ့ ကိုယ်ပွားကိုရရှိဖို့အတွက်ကို တစ်ဖန်တလဲလဲ ရှာဖွေနေရတယ်တဲ့။ စစ်မှန်တဲ့ ကိုယ်ပွားကို ဘ၀မှာ တစ်ကြိမ်တစ်ခါထဲနဲ့ ရှာဖွေခွင့်ရခဲ့တဲ့အတွက် သူကျေနပ်လို့မဆုံးပါဘူး...တဲ့။

စကားမစပ် အခု ဒီပို့စ်က သူနဲ့ကျွန်မရဲ့ လက်ကလေး ၂ဘက်ကလည်း သူ့ အိုင်ဒီယာ။ ဓာတ်ပုံလေးကတော့ မြသွေးနီ ကိုယ်တိုင် လက်တစ်ဖက်ထဲနဲ့ ခဲရာခဲဆစ် ရိုက်ယူခဲ့ရတာလေ။ ချစ်ခင်ရတဲ့ အစ်မချစ်ကြည်အေး ခရီးမထွက်ခင် ဒီTag Postလေး ဖတ်သွားစေချင်လို့ တက်သုတ်ရေး လိုက်ရပါတယ်ရှင်။  ဒီပို့စ်လေးအတွက် မချစ်ကျေနပ်မယ်လို့ မျှော်လင့်လျှက်.....။

ဆန္ဒနဲ့ဘ၀ တစ်ထပ်တည်းကျကြပါစေရှင်။



မြသွေးနီ